Безпечностна рада Орґанізації зъєдиненых народів у понедільок єдноголосно прияла штири резолуції. Членьскы державы першый раз голосовали з причіны пандемії через імейл, інформовала аґентура Associated Press. Членове рады вырішыли о зохабліню вояків у суданьскім реґіоні Дарфур до кінця мая 2020-го року і продовжыли діяня політічной місії ОЗН в Сомалії до 30-го юна того року. До 30-го апріля быв продовженый мандат експертной ґрупы в Северній Кореї, котра є повірена моніторінґом дотримованя санкцій. Членьскы державы Безпечностной рады так само підкреслили важность підпоры великых мірных операцій ОЗН. Остатні тыждні представителі країн рады, котра є найвпливнішым орґаном ОЗН, їднають лем через відеоконференції.

(Медвідь, TASR)