Ґрекокатолицька харіта Пряшів розшырила службы на поміч одыйдженым із Україны. Як інформовала аґентура TASR, у вівторок 23-го авґуста 2022-го року одкрыла в Пряшові на Сабіновскій уліці, в будові бывшого Готела Шаріш, центер підпоры. Харіта в нім буде забезпечовати соціалну поміч, адміністратівну підпору, освіту, вольночасовы актівности, гуманітарну поміч і допроводжіня. Одкрытя центра підпоры проходило за участи владыкы Петра Руснака, апостольского адміністратора Пряшівской архієпархії, представителів Уряду Пряшівского самосправного краю і міста Пряшів. Владыка Петро посвятив просторы нового центра. Центер підпоры Ґрекокатолицькой харіты Пряшів є частьов сполочного проєкту окремых дієцезных, архідієцезных і єпархіалных харіт на Словакії під покровительством Caritas Slovakia. (ЛЕМ.ФМ, Pkf)