Ґрекокатолицька церьков на Словакії спустила 1-го марца новый донорьскый портал dobrodinec.online, о чім єпіскопи вшыткых трьох єпархій інфомровали в пастырьскім листі на Неділю сыропустну 2-го марца. Цільом того порталу є фінанчна підпора душпастырьсва, окремо платів духовных, актівностей окремых парохій і далшых проєктів в рамках церькви. Портал є справованый вшыткыма трьома єпархіями і быв ку ньому зрядженый фонд. Віруючі собі на порталі можуть выбрати свою єпархію, і пак свою парохію, і прямо підпорити свою реліґійну гормаду і свого священика. Проєкт є „запрошіньом про віруюшіх ку фінанчній підпорі свойой церькви і посилніньом того важного джерела фінанцованя до будучности,“ пише ся на сайті Пряшівской архієпархії.

(Медвідь)