Мужска співацька ґрупа Шамбрінці із Шамброна в окресі Стара Любовня того року славять красный юбілей – 10 років свого успішного єствованя. Ґрупа на челі з Міланом Щіґуліньскым мать за собов многы успіхы нелем на домашній сцені, на фестіваловых сценах русиньского і словацького реґіону, успішну репрезентацію в „шов“ Земля співать (Zem spieva) в словацькій телевізії, бывшій РТВС, але і за граніцями нашой країны, їх співанкы переберають многы співаци і співачкы ці інштрументалны ґрупы. Тот юбілей ославили 19-го октобра в Домі културы в Старій Любовні. Притомны даной вызначной події могли ся дознати, наприклад – хто выдумав мужскій співацькій ґрупі назву, яка была путь ґрупы почас десять років, хто є про них прикладом в области фолклору і чом тото вшытко властні ціле роблять. Вечур повный (нелем) русиньского співу, музикы, eмоцій, aлe і споминаня і біланцованя, быв доповненый і гостями: Людовов музиков Вербунк, Пастерноцами і Русиньскым тріом. Концерт быв реалізованый з фінанчнов підпоров Фонду на підпору културы народностных меншын. Джерело фотоґрафіі: Facebook/Мартін Караш (А.Кузміакова, ПКФ)