Як у віторок 18-го юна 2024-го року інформовало Одділіня комунікації Пряшівского самосправного краю (ПСК), до гуманітарной помочі про родины, котры постигли недавны зливы в окресі Снина, залучать ся і пряшівска крайска самосправа. Поміч іде конкретно до русиньскых сел Вубля і Михайльов, де промптно поможе ся штирьом жадателям. Розділило ся про них майже 6 тісяч евр, і то посередництвом крізового фонду фундації ПСК. Минулотыждньовый додж в окресі Снина залляв веце домів, так само студні, запхав каналізацію і підписав ся так само на многых місцях під зосуваня землі. Шкоды на маєтку рахують і родины із сел Вубля і Михайльов. Зато край вырішыв помочі їм урґентно. Скликана была Справна рада Фундації ПСК про підпору родины, і посередництвом фонду про рішіня крізовых сітуацій, в котрім суть обидві села приголошены і давають до нього каждый рік встановлену суму, розділило ся меджі найвеце постигнуты родины 5 900 евр. Фінанчна поміч іде про три родины із села Вубля, і єдного жадателя із села Михайльов. (ЛЕМ.ФМ, Пкф)