Будованя арендованых квартелів і приправа локаліты на выбудованя родинных домів суть меджі пріорітами міста Свідник у новім функчнім періоді. Як про аґентуру TASR повіла пріматорка Свідника Марцела Іванчова, котра в октобровых комуналных выборах обгаїла свою функцію, зреалізовати хотять і проєкты, котры были уж підпорены. Меджі послідніма підпореныма проєктами є і проєкт реґенерації а реконштрукції внутроблоку майже в центрі міста, котрый має змінити ся на оддыхову зону. До роботы ся хотять пустити на ярь слідуючого року. У высокім штадію суть подля пріматоркы розроблены і далшы проєкты. Як конкретізувало пріматорка міста, є то наприклад вытворіня заряджіня соціалных служеб, проєкт  арендованых квартелів, де выникне в будові бывшого інтернату 52 арендованых квартелів і проєкт будованя 40 родинных домів в єдній зо свідницькых локаліт.  (ЛЕМ.ФМ, Pkf)