В середу 5-го януара у віці 84 років умер в Пряшові Андрій Гнат, русиньскый културный діятель. Народив ся 19-го септембра 1938-го року в селі Вышня Радвань, днесь Радвань над Лабірцьом. Цілый свій жывот присвятив културі Русинів, довгы рокы (од 1960-го року) робив як менежер днешніх професіоналных колектівів – Театру Александра Духновіча і Піддукляньского умелецького субору (ПУЛС) в Пряшові. За успішне културно-освітнє діятельство быв у 1975-ім році удостоєный честным тітулом Заслуженый працовник културы, котрый му передав тогдышній міністер културы Мірослав Валек. Oкрем Чехословакії з театралныма грами і проґрамами ПУЛС-у навщівив многы штаты Eвропы, а в році 1972 aбсолвовав і троймісячне турне ПУЛС-у по Споєных штатах Америкы, де мав колектів великый успіх. Од 1981-го року аж до одходу на пензію быв умелецькым шефом ПУЛС-у. О роботі в нашім театрі і ПУЛС-і написав многы статі, котры выходили на продовжіня в Народных новинках Інфо Русин.   Андрій Гнат быв похованый в суботу 8-го януара в своїм роднім селі Радвань над Лабірцьом. Вічная йому память. (А. Кузмякова)