Русиньскый ґрекокатолицькый молитвенник під назвов Радуйте ся в Господі в тых днях по двогых роках дістав імпріматур – позволіня на печатаня, од пряшівского архієпіскопа і метрополіты кір Йоана Бабяка. Як інформовали членове Общества св. Йоана Крестителя, котре молитвенник приготовило, выдрукованый бы мав быти в літі того року. Буде обсяговати цілу Літурґію св. Йоана Златоустого, тропарі, кондакы, панахіду, парастас, части утрені і вечурні, молитвы ці духовны пісні. Молитвенник буде мати дзеркалово тексты по русиньскы і церьковнославянькы. Так само Рада єрархів Ґрекокатолицькой церькви на Словакії на своїм остатнім засіданю в пятніцю 30-го апріля зрядила комісію біблістів, котры сконтролюють тексты русиньского перекладу Нового завіта. По контролі і уділіню імпріматуру так будуть мати Русины к діспозіції цілый Новый завіт по русиньскы.

(Медвідь)