Послідньов тогорічнов подійов в Словацькім народнім музею – Музею русиньской културы в Пряшові буде Рождественный вечур, котрый одбуде ся в пятніцю 13-го децембра 2024-го року. Як за музей інформовала Яна Трущіньска, навщівників події чекать концерт рождественных коляд в інтерпретації Хору святого Романа Сладкопівця, якый буде доповненый духовным словом архімандріты Марка Дурлака – протосінкела Пряшівской архієпархії. Хор святого Романа Сладкопівця выникнув в 1993-ім році і творять го богословы Ґрекокатолицькой священьской семінарії блаженого Павла Петра Ґойдіча в Пряшові. Діріґентом хору того часу є отець Томаш Пецух. Джерело фотоґрафії: Facebook/ЛЕМ.ФМ (ЛЕМ.ФМ, Пкф)