Реконштрукція Музея модерного уменя Енді Варгола в Меджілабірцях продовжує подля плану. До кінця календарьного року бы мала быти в рамках перебудовы проінвестована сума 12,7 міліона евр. Почас контрольного дня 19-го авґуста 2024-го року то повів председа Пряшівского самосправного краю (ПСК) Мілан Маєрьскый, інформує аґентура TASR. На реконштрукцію і модернізацію музея ПСК хоснує властны фінанції і дотацію од державы.’ За словами Маєрьского почас реконштрукції появили ся і непланованы роботы, котры выжадали собі додаточны кельчікы в сумі приблизно 400 тісяч евр. Як дале додав, же початком слідуючого року бы хотіли зачати з роботами в інтерьєрі музея. Очекують так само підпору од сучасной влады, жебы годны были комплексно докінчіти тото велике діло, котре має надреґіоналне і меджінародне значіня. Реконштрукція музея почала в апрілю 2023-го року а його одкрытя є плановане найпізніше в місцяці юл 2025-го року. Фото: Facebook/ЛЕМ.ФМ. (ЛЕМ.ФМ, Пкф)