Як інформовала аґентура TASR, Україна потвердила як пункт приключіня планованой автострады D1 в части од села Бідовці ку україньскій граніці переход Вышнє Німецьке – Ужгород. На тім гранічнім переході о тім в понедільок  24-го октобра 2022-го року інформовав радник председы влады Словацькой републікы про черезгранічну співпрацу Едуард Бураш. „Жебы могла закінчіти ся мултімодална штудія, котра ся приготовлює про тоту часть автострады, є барз важным, жебы україньска сторона конкретно писомно выраховала пункты приключіня. І днесь было потверджено, же тым пунктом буде гранічный переход Ужгород – Вышнє Німецьке,“ повів Бураш. Частьов їднаня была і кооперація сил на граніцях меджі словацьков і україньсков сторонов. Нароснутя накладного транспорту на граніцях запричінює комплікації в довжці часу, котрый на граніці треба чекати. Як дале повів Бураш, „то запричінене тым, же україньска сторона не має докінченый гранічный переход про особный транспорт, котрый ся довгодобо ремонтує. Но днесь нам потвердили, же здобыли фінанції на технічму поміч в сумі 1,2 міліона евр. Приобіцяли при тім, же до кінця року бы мав быти гранічный перехоф Ужгород – Вышнє Німецьке з україньского боку докінченый, што бы одлегшало накладный транспорт.“  (ЛЕМ.ФМ, Pkf)