Пряшівскый самосправный край (ПСК) выділив із свого розрахунку 100 тісяч евр на поміч людям, котрых засягло недавне землетрясіня. Грошы розділить Фундація ПСК про підпору родины меджі людей. Як інформує аґентура TASR, посланці Заступительства Пряшівского самосправного краю то схвалили на своїм засіданю, котре одбыло ся в понедільок 23-го октобра. Грошы при тім дістануть лем фізічны особы. Можуть їх схосновати на реконштрукцію дому, квартелю або на купліня заряджіня, котре было пошкоджене. Наслідно треба схоснованя грошей здокументовати. Председа ПСК Мілан Маєрьскый вірить, же і нова влада выділить грошы на поміч людям по землетрясіню. Єдночасно очекує, же в слідуючім році буде мати край свою Вызву про реґіон прямену на поміч засягнутым селам і містам, жебы годны были оправити свої школьскы або културны інштітуції.

(Медвідь, TASR)