З розрахунком понад 275 міліонів евр буде у 2024-ім році господарити Пряшівскый самосправный край (ПСК). В порівнаню з тым роком є то о 14 міліонів веце. В понедільок 11-го децембра 2023-го року о тім вырішыли посланці Заступительства ПСК на своїм посліднім тогорічнім засіданю. Як інформовала Леа Леготьска з Одділіня комунікації ПСК, і у 2024-ім році крайска самосправа підпорить добры проєкты в реґіонах. Цілково ся на дотації выділили 4 міліоны евр, і заінтересованы будуть годны жадати о фінанчну підпору од 2-го януара 2024-го року, о чім так само вырішыли посланці на децембровім засіданю. Найвысшу суму – два міліоны евр, посланці схвалили у Вызві про реґіон в котрій жадателі з Пряшівского краю будуть годны жадати край о дотацію на свої проєкты в штирьох проґрамах  – ціклотранспорт, турістічный рух і путницькый турізм, културу а шпорт, і соціалны службы. У Вызві посланців ПСК є алокованых 1,43 міліона евр, і у Вызві председы ПСК 440-тісяч евр. Термін на передкладаня жадостей у вшыткых трьох споминаных вызвах є до 19-го фебруара 2024-го року. Посланці ПСК схвалили і 130 тісяч евр на Вызву Партіціпатівный розрахунок, котра є заміряна на реалізацію общехосенных проєктів і общехосенных служеб з цільом залучіти до вырішованя о вітязных замірях жытелів краю. (ЛЕМ.ФМ.Пкф)