Місто Пряшів зреалізувало дальше выплачіня з офіціалного бютжету про пошкодженых обывателів з Мукачівской улиці, на котрій запричинив розсяглы шкоды минулорічный выбух пліну. Покы было перерозділеных 553.500 евр. Пресову аґентуру TASR о тім інформував говорця міста Владімір Томек. Перше выплачіня про обывателів доткнытых выбухом на Мукачівскій улиці зачало місто выплачувати 20-го децембра 2019-го року. Были зреалізуваны на основі жадостей од самых обывателів на Мукачівскій улиці ч. 7 і 9. Публічна збірка тырвала до 31-го януара. На бутжеті є днесь скоро 4,4 міліонів евр. Радниця даны гроші перерозділить уж лем маїтелям квартель з асанованого панелаку на Мукачівскій 7. Выбух пліну і наслідный пожар в 12-штоковім панелаку на Мукачівскій улиці 7 на пряшівскім сідліску 6-го децембра 2019-го року непережыло  сім людей, єдна особа є страчена. Панелак буряли од 16-го до 18-го децембра. Кризовый штаб вырішыв, же є потрібне його асановати цілый. В пятницю 17-го януара быв асанованый, вывезеный і уложеный цілый оставаючій скелет панелового дому.  (TASR, Pkf)