Пряшівска архієпархія і ціла Ґрекокатолицька метрополітна церьков нa Словакії готує святкованя веце річніць. Зато пряшівскый архієпіскоп метрополіта Ян Бабяк выголосив Юбілейный рік Пряшівской архієпархії  2018. Зачатком рока в храмах Пряшівской архієпархії буде звучати пастырьскый лист. Головным юбілейом буде 200 років од зряджіня Пряшівской єпархії булов Relata semper папы Пія VII. із 22-го септембра 1818-го рока. З далшых річніць то буде 10 років од зряджіня Пряшівской метрополітной церькви sui iuris, то значіть і юбілей повышіня Пряшівской єпархії на архієпархію, Кошыцького апостольского ексaрхату нa єпархію і зряджіня новой Братіславской єпархії. Вызначным юбілейом буде і 50 років обновы ґрекокатолицькой церькви в бывшій Чехословакії по 18-річнім заказі, 1155 років од приходу св. Кіріла і Мефодія на Велику Мораву, 15 років од благоречіня гєрoмученика Василя Гопка цi 30 років од выголошіня базилікы мінор в Лютині.
(А. Кузмякова)