Цалком перше археолоґічне дослїджіня реалізують протягом того лїта на Тібавскім градї в селї Підгородь в Собраньскім окресї. Принїс уже і першы резултаты. Іде о найвыходнїше сітуованый і єден з найменшых градів на Словакії. Першый запис о нїм походить з року 1337. Быв коло 40 метрів довгый і 13 аж 15 метрів шырокый. Повнив правдоподобнї обранну функцію. Маїтелями была правдоподобнї шляхта з Михаловець, пізнїше і панове з Тібавы. Єден з вызначных і остатнїх обявів на тім градку є з року 1946, коли учітель Дудїк обявив 25 рімскых мінці в полотнянім мішку. При актуалнім археолоґічнім дослїджіню, котрый реалізує Археолоґічный інштітут Словацькой академії наук Нїтра в сполупраці з їх побочков в Кошіцях, ся зробило десять сонд. Тоты, як увів історік і одборный ґарант выскуму Матєй Старяк „помогли ідентіфіковати проход заниканя градеб а їх шырку і обєкты, котры были сучастёв надворя а тоже інтерьєр могутной валцовитой турнї. Веце із сонд принеслы істы прекваплїня. Спомянув бы єм сонду, котра ся находить в тім ціпі градбы, в нашім розуміню в западній части над бывшым камінёломом, де ся обявив обєкт, правдоподобнї обранна башня. Далшов вызначнов сондов была сонда, де ся подарило ідентіфіковати простор вступной браны, то значіть простор, де ся входило на градне надворя. Но а далша сонда была сітуована в просторї валцовой башнї, де одкрыла сходы в грубцї муру той башнї.“ Сондаж проходить іші дале а глядати теперь будуть подлагу. Ініціатором захраны Тібавского граду є обчаньске здружіня Tibavská hradná cesta.
(TASR)
Фото: TASR