В суботу 11-го новембра, в день 99-ой річніці закінчіня Першой світовой войны в кріпті під православнов церьквов в Осаднім одслужыли панахіду за павшых вояків. „Почас вшыткых богослужінь собі споминаме на павшых вояків, котры суть похоронены в нашій кріпті, і на вшыткых героїв воєн. На річніцю, як є тота днешня, приходиме до кріпты, жебы сьме ся помолили прямо на тім пєтнім місці і при погляді на кістя одсудили войну,“ повів в суботу про словацькый денник Korzár православный парох в Осаднім Петро Сорока. Найтяжші бої Першой світовой войны проходили як раз на северовыході днешньой Словакії. Ту находить ся і найвекше чісло воєньскых цінтерів. Найунікатнішым з них є в кріпті під православнов церьквов в Осаднім. В єднім гробі є похороненых 1025 вояків і далшых веце як 1400 лежыть в двох шахтах на містнім цінтері.
(Петро Медвідь)