В Пряшові в суботу  8-го фебруара 2020-го року проходило 31. засіданя Округлого стола Русинів Словеньска (ОСРС). Платформа русиньскых професіоналных інштитуцій, обчаньскых здружінь і актівістів прияла два акчны планы, котру суть повязаны з Роком русиньского села і кампаньов перед Переписом населіня, домів і квартелів 2021, котры єдночасно представив председа ОСРС Петро Штефаняк. ОСРС на засіданю тыж зрядив Орден Адолфа Добрянского, котрый буде удільовати фізічным і правницькым особам, котры заслужыли ся о розвиток народной ідентіты, обгайобу прав Русинів выходячіх з меджінародных документів і підніманя якости жывота Русинів на Словакії ї в заграничу. ОСРС так хоче оціньовати заслугы на благо Русинів. Першый раз буде ОСРС передавати тоту нагороду 22-го фебруара 2020-го року на 2. Репрезентачнім балі Русинів, котрый одбуде ся в Кошыцях.  Участны на засіданю вырішыли, же Орден Адолфа Добряньского 4. класы буде запожычаный Васильові Ябурові і Анні Кузмяковій, Орден Адолфа Добряньского буде запожычаный Богданові Ґамбальови. (Лем.фм, Pkf)