Одбыла ся презентація книжкы о професорови Маґочійови
В пятніцю 21-го юна 2024-го року в просторах Пряшівской універзіты в Пряшові одбыла ся презентація новой книжкы доц. Володиміра Фенича, к. н. із Ужгородьской націоналной універзіты під назвов Історік і проблемы народтворіня: научна і общественна робота Павла Роберта Маґочія, котра вышла по україньскы у Выдавательствi Падяк. На презентації окрім автора і выдавателя, котрый є єдным із рецензентів, быв присутный так само проф. Др. Павел Роберт Маґочій, і далшый рецензент проф. ПгДр. Петер Шворц, к. н. – історік із Пряшівской універзіты, котрый довгодобо занимать ся окрім іншого і історійов Русинів. Сучасный америцько-канадьскый і русиньскый історік Павел Роберт Маґочій, котрый занимать ся професіонално україністіков і русиністіков, є автором понад 900 публікацій, причім в тім чіслі є майже 70 книжок. І так фахова робота, котра має ціль серьйозно і детайлно захопити його довгорічну діятельность, під руками Володиміра Фенича выникала довшый час. Нова 640-сторінкова публікація (оріґ. назва Історик і проблеми націєтворення: наукова та громадська діяльність Павла-Роберта Маґочія) почала выникати у 2020-ім році. Жрідло фотоґрафії: Facebook/ЛЕМ.ФМ (ЛЕМ.ФМ, Пкф)
-
Назад / Nazad Промітаня філму о Михаілови Чухранови
-
Далше / Dalše Новы черезгранічны проєкты ПСК за 11 міліонів евр і в русиньскых реґіонах