Сім ініціатів підписало позіцію неспокійности з подїями, якы ся дїють на Основній умелецькій школї на Міровій уліці в Гуменнім. Повказують на упозорнїня про учітельку Даньєлу Половкову за порушіня робочой дісціпліны з боку єй директора у звзї з остатнїм згромаждїнём Za slušne Slovensko, котре ся в містї одбыло 15. апріля, і на котрім учітелька выступила. Директор школы Іґор Ганак твердить, же на разнїшы крокы го вызвали єй колеґове. Подля них Даньєла Половкова, як учітелька Основной умелецькой школы, на протестї описала свої скушености із зряджователём школы – містом Гуменне і своїм директором. Зо слов директора він сам єй уже скорше пожадав, же кедь хоче свої особны погляды надале зверейнёвати в медіях, няй ся выядрує як приватна особа а не як учітелька і бывша директорка школы. В позіції, котру ініціатівы підписали, ся уваджать, же: „є неакцептовательне, жебы у выспелій країнї ЕУ было порушоване право на слободу прояву закотвене в Конштітуції СР. Таке засїгованя до прав і слобод учітеля выховлюючого будучу ґенерацію є грубым порушінём основных демократічных принціпів‟. Єднов з тых ініціатів є і Ініціатіва словацькых учітелїв, котра повказує на скушеность з пріматорков Гуменного Янов Валёвов, як з чоловіком, котрый в минулости оцїнёвав учітелїв за нештрайкованя. Учітелька Даньєла Половкова має повну підпору ініціатів. Жадають неодкладне заставлїня такого конаня, а кедь не дійде к направі, так будуть зважовати обернути ся на европскы інштітуції про порушованя основных людьскых прав.
(Korzár, Цітрякова)