В рамках польско-словацькой сполупраці і проґраму Інтерреґ буде зо средства Европской унії підпореных дальшых 32 проєктів. На території Пряшівского самосправного краю (PSK) бы ся мало реалізувати 20 з ных в цілковій сумі 23,5 міліонів евр. Одобрены проєкты підпорять многы області в културі, освіті і так само в транспорті, конкретно в області модернізації доріг. Пресаґентуру ТАSR о тім інформувала говоркыня PSK Даша Єленьова. Цілковый пакунок розділеный меджі схвалены проєктовы жадости в рамках трьох пріорітных вызев представує 33 міліонів евр. З участьов партнерів з PSK іде притім до польско-словацького пригранича з даной сумы вецей як 23,5 міліонів евр. Найвецей фінанцій піде на сполуфінанцованя розвоя природньой і култорной дідовизні. (TASR, Pkf)