Представити важны проєкты і планы, а так само діскутовати о сполочных замірах, котры мають помочі далшому розвитку теріторії, было цільом стрічі містной і реґіоналной самосправы, котра одбыла ся в понедільок 24-го марца в Пряшові. Ініціовав єй Пряшівскый самосправный край, і брало на ній участь прблизно 400 представителів міст і сел. Меджі головны темы належали еврофонды, стратеґічны проєкты, крайскы дотації, концепція турістічного руху, ціклостежкы, інфраштруктура драг, автобусовый транспорт, і проєкт Flores, котрый замірявать ся на проґнозу і превенцію блисковых злив. На засіданю представили ся і проґрамы черезгранічной співпраці, участны занимали ся і далшыма темами. Важнов темов были і інтеґрованы теріторіалны інвестіції, де Пряшівскый край має алокованых понад 293 міліонів евр.

(Медвідь, PSK)