Місто Стропків очікує у звязку з коронавірусом дефіціт на поділовых данях скоро 392.000 евр. Містьскы посланці на своїм мінулотыждньовім їднані одобрили зміну актуалного розрахунку. У выдавковій часті бежного і капіталового розрахунку пришло к пару змінам.  Пресову аґентуру TASR о тім інформував говорця міста Петер Новак. За першых пять місяців в року, за його словами, зачали із реалізаційов пару проєктів. Єдным з них была санація нелеґалных складок в локаліті обываныма марґіналізованыма ґрупами Під Лашчіком і За ярком. Завдякы проєкту за выше 53.000 евр фінанцованого з еврофонду і властных средств з даного місця вывезли скоро 900 тон одпаду. В реалізації суть і проєкты – Реконштрукція храмовой башні за 145.000 евр і Модернізація одборного класу в Основній школі на Конштантиновій улиці за скоро 190.000 евр. Так само приправують реконштрукцію турістичной хаты в локаліті Під влеком, вєдно з выставбов выглядковой башні і вызначіньом ціклотурістичного пішника на польскій границі, вєдно за выше 150.000 евр. В етапі приправы є і выбудованя новой матерьской школы Під Лашчіком за 815.000 евр. (TASR, Pkf)