Місто Пряшів ся залучіло до вызвы на даня дотації на ревіталізацію колышнього ареалу скатепарку на Баштовій улиці. Главным цільом проєкту є перепоїти різны комуніты через рушаня ся. Інформує о тім на своїй інтернетовій сторинці. Радниця планує теріторію обновити о шпортовы і оддыховы елементы про вшыткы віковы катеґорії, чім бы выникла мултішпортова зона.  Місто припоминать, же даным проєктом рефлектує на довгочасовы пожадавкы комуніты скатерів на обнову просторів, як і на пожадавку дальшых обывателів чі школ і школскых інштитуцій на вытворіня комунітного простору нелем про шпортовы актівіты в центрі міста. В сітуації, же місто Пряшів буде у вызві Міністерства інвестицій, реґіоналного розвоя і інформатізації СР успішне, з реалізаційов бы ся могло зачати кінцьом тогорічной осени. Джерело фотоґрафіі: facebook: Prešov skatepark (TASR, Pkf)