Пряшівскый самосправный край оправив драгу меджі селами Мала Поляна в окресі Стропків і Красный Брід в окресі Меджілабірці. В рамках тых робот, котры были завершены на кінцю минулого тыждня, было обновленых і пять мостів. Край проінвестовав на тот проєкт понад 4,2 мілона евр, інформовала Леа Геілова з одділіня комунікації і пропаґації Уряду ПСК. Найскладнішов частьов цілого проєкту реалізованого од минувшого року была подля директора Справы і утримованя драг ПСК реконштрукція моста в Краснім Броді. Тот штирипольовый міст через ріку Лаборець, котрый іде і понад штреку Гуменне – Меджілабірці має понад 90 метрів і є высокый майже 15 метрів. Почас реконштрукції мусив транспорт міст обыйти через село.

(Медвідь, TASR)