У віторок 11-го юна 2024-го року в Братіславі одбыло ся удільованя Цін і Премій Літературного фонду (Literárny fond) за оріґіналну творчость. Окрeм нагород за літературу в словацькім языку были оцінены і творы народностных меншын – мадярьской, русиньской і україньской. Раз за два рокы Літературный фонд уділює Ціну і Премію Александра Павловіча за русиньску літературу. Тот рік оціньовали ся творы за період років 2022 і 2023. Лавреатом Ціны Александра Павловіча став знамый русиньскый поет Юрко Харитун. Ціну здобыв за книжку Дякую, мамко!, котру в другім выданю выдало обчаньске здружіня Колысочка у 2023-ім році. Є то зборник, в котрім находить ся дітячій фолклор, суть в нім і нотовы записы ку співанкам. Другов оціненов была Анна Кузмякова, довгорочна русиньска діятелька і редакторка періодічной і неперіодічной пресы. Премію Александра Павловіча дістала за переклад прославленого твору Чарлса Дікенса Рождественна коляда зо словацького до русиньского языка, котру  у 2023-ім році выдало обчаньске здружіня молоды.Русины. Жрідло