21-го децембра проходив в Бібліотеці карпаторусиністікы Інштітуту русиньского языка і културы заключный семінар, на котрім были выголошены резултаты 4-го річника Літературного конкурзу Марії Мальцовской на найліпшы творы в области поезії, прозы, есеїв і драмы в літературнім русиньскім языку. Інформовала о тім в остатніх днях Кветослава Копорова, председкыня Сполку русиньскых писателів Словеньска. Тот рік приголосило ся вісем авторів, з того двоми были дебутантами. Двоє авторів загнало по два жанры. Журі конкурзу в складі Кветослава Копорова, Михал Павліч і Михала Голубкова оціньовала довєдна 10 оріґіналных творів по русиньскы написаной поезії і прозы. На першім місці скінчів Владіслав Сивый, котрый ся до конкурзу приголсив по першый раз із свойов поезійов. Журі друге місце признала двом авторам – поетам, Штефанови Сухому і Юркови Харитунови. Третє місце здобыла так само з поезійов Людмила Шандалова.
(Петро Медвідь)