Як вызерала Щедра вечеря на замку? Якы были звыкы на селах перед Рождеством? Тото вшытко можуть од вчерашнього дня видіти навщівници замку і сканзену в Старій Любовні.  Любовняньскый музей приготовив уж другый рік проґрам під назвов Рождество в музею про дітей і дорослых, котрый буде в музею презентованый до пятніці 8-го децембра. Почас цілого тыждня  музей, окрем іншого приближыть стародавны традіції на Андрія і Луції, котры будуть проходити в ареалі сканзену, меджі деревяныма хыжками і в млині зо села Малый Липник. Подля слов Далібора Мікуліка, директора Любовняньского музею, люди собі можуть выслухати різны пригоды, видіти роботу прядок, выпробовати лятя олова ці варіня і печіня традічных їдел. В просторах замку приближать і Щедру вечерю з 30-ых aж 40-ых років 20-го столітя, де буде гостительом градный пан а дітей буде обслуговати ґаздыня. Навщівници музею увидять, як в тім часі вызерала рождественна ялічка ці дарункы, а в градній каплічці буде выставленый і віфлеєм із 19-го столітя.
(Аннa Кузмякова)