Вірну репліку леґіонарьского влаку з років 1918 – 1920 можуть навщівници видіти до 3-го септембра на Главній уліці в Кошыцях. Кошыці суть єдиным містом в рамках Словеньской і Чеськой републікы, де ся тот путовный музей презентує прямо в центрі міста. Уможнює то електричкова штрека, на котру наіншталовали окремы возні. Влак творить єденадцять оправленых вознів, котрыма ся везли десятьтісячі чеськословеньскых леґіонарів через Росію по Транссібірьскій маґістралі, а попритім бойовали. Сучастьов выставы суть многы добовы документы і цінны артефакты. Провадници влаку в стародавных мундурах ведуть навщівників влаку одборным выкладом а знають помочі і з выгляданьом члена родины, діда ці прадіда, котрый быв леґіонаром.
(Петро Кімак-Фейко)