Пряшівскый архієпіскоп і митрополіта Йона Максим быв призначеный за члена Дікастерії про восточны церькви. У віторок 22-го октобра 2024-го року о тім інформовав Пресовый центер Святішого Престола. Окрім кір Йоны, котрый моментално бере участь на засіданю Сіноду єпіскопів о сінодалности у Ватікані, Вселеньскый Архієрей – Папа Франціск выменовав веце далшых членів Дікастерії про восточны церькви. Кір Йона так став членом на 5-річный період. Дікастерія про восточны церькви є єднов із шістьнадцятьох дікастерій Римской курії, котра має задачу старати ся о восточны церькви, якы суть в єдности з Апостольскым Престолом.

(Медвідь, фото: Vatican News)