На проєкты, котры суть повязаны з розвойом турістичного руху Кошыцькый самосправный край (КСК) тот рік выділив вєдно 1,89 міліона евр. Підпора через проґрам Terra Incognita вмістить в собі зліпшіня турістичной інфраштруктуры, взник новых турістичных атракцій, меджінародны і реґіоналны події і філмовый турізм. Выбраны проєкты вчера презентовала крайска орґанізація Кошыці Реґіон Турізмус. Найвекша часть з цілковой ґрантовой підпоры – 1,32 міліона евр іде на три катеґорії проєктів. Патрять до них великы розвойовы проєкты, од котрых собі край обіцяє взник новых атракцій про шыроку верейность і з тым повязане даваня новых служеб і вытварянь новых робочіх місць в реґіоні. Такыма суть наприклад вытворіня природного блудіска в Брегові, 21-метрова выглядкова турня на Земплиньскій Шіраві ці скатепарк в кошыцькій містьскій часті KVP.  Тогорічнов новинков є амбіція зліпшыти турістичну доступность четверо храмів на Ґемері, котры здобыли значку Европской дідовизні. На тот ціль была выділена сума 75.000 евр. Іде о сакралны памяткы в Штітніку, Охтіней, Коцельовцях і Плешівці. Зажітковы події в краї достануть підпору 420.000 евр. Дотулять ся то цілково 13 меджінародных і 20 реґіоналных проєктів. (TASR, Pkf)