Крішлівці, Стропківского окресу, суть невеликым село з чіслом жытелів 31. I з той причины пакунок фінанції на розвой села є барз малый. Наперек даній сітуації веджіня села ся снажыть што найвецей про обывателів зробити. В посліднім часі то было наприклад высвячіня новой сельской печаті і ербу, реконштрукція інтерєру і ехтерєру сельской церкві, реконштрукція 2,5 км дорогы в селі, реконштрукція културного і сельского уряду. На наш вопрос, як ся ім дарить фінанцовати ці сполуфінацовати даны інвестичны проєкты і якы мають планы до будучності старостка села Крішлівці Моніка Довічакова про наше радіо Русин.фм повіла, „дотеперь што сьме в селі робили, так сьме робили передовшыткым з властных і спонзорьскых фінанцій. Наприклад на высвяцьку ербу і печаті сьме мали спонзорів. Єдным зо способів як ушетрити фінанції в селі є іти старостові на мінімалный робочій обовязок, в моїм припаді то значіть на дві годины денно. А што ся тыкать планів, тых неє много. Теперь робиме на єднім меншім проєкті цільом котрого є оплочіня нашого сельского цвинатря.“
(Кімак-Фейко)