Уж днесь зачне цілословацькый русиньскый конкурз під назвов Співы мого роду, котрый орґанізує Русиньска оброда на Словеньску. Од першого до четвертого фебруара будуть проходити концерты співаків з цілого русиньского реґіону і гостів споза граніці. Першый концерт зачне в пятніцю у селі Камюнка, потім будуть проходити концерты дітей і дорослых в селах Якубяны, Чірч і Удол в Старолюбовняньскім окресі. Вшыткых співаків, котры поступили до конкурзу, буде музично спроваджати Людова гудьба фолклорного колектіву Хемлон. Завершіньом русиньского співацького конкурзу буде выголошіня тогорічных лавреатів спомеджі дітей і дорослых. Конкретны інформації о окремых концертах найдете на сайті Русиньской оброды на Словеньску.
(А. Кузмякова)