Од 9-го юна 2024-го року в Пряшові проходить Studium Carpato-Ruthenorum 2024 – 12-ый рочник Меджінародной літньой школы русиньского языка і културы, котру орґанізує Інштітут русиньского языка і културы Пряшівской універзіты в Пряшові. Тот рік має літня школа довєдна 23 штудентів, з чого 19 є загранічных. Загранічны штуденты Studium Carpato-Ruthenorum 2024 прийшли із Споєных штатів Америкы, Канады, Польщі, Україны, Хорватії, Сербії і Чеськой републікы. Літня школа русиньского языка тырвать три тыждні, тот рік закінчіть ся святочным передаваньом діпломів о абсолвованю в пятніцю 28-го юна. Почас школы про штудентів были приготовлены і супроводны події як творчі варштаты, навщівы музеїв і історічных памяток повязаных з Русинами і русиньсков културов, ці навщіва Театру Александра Духновіча.  Так само почас Studium Carpato-Ruthenorum 2024 першый раз штуденты в рамках проґраму навщівили будинок Стоваришыня Руска Бурса в Ґорлицях, де мали можность познакомити ся наприклад і з роботов нашого партенрьского радія а порталу lem.fm. Жрідло фотоґрафії: Facebook/ЛЕМ.ФМ (ЛЕМ.ФМ, Пкф)