Днешнім дньом ся офіціално закінчив святочнов подійов юбілейный Рік Адолфа Добряньского. Юбілей, котрый быв выголошеный Округлым столом Русинів Словеньска, проходив із нагоды 200-ой річніці од народжіня того вызначного русиньского політіка і реформатора. В рамках Року Адолфа Добряньского окремы русиньскы орґанізації присвятили свої події як раз тій вызначній історічній особности. Актівности і події присвятило юбілею наприклад Общество св. Йоана Крестителя, котрого член отець Мілан Ясик, ґрекокатолицькый парох в Ольці, выдав і книжну публікацію під назвов Адолф Добряньскый, вызначный репрезентант Русинів 19. столітя. Єдиный у світі професіоналный русиньскый театер вернув до свого репертоару із нагоды юбілейного року пєсу словацького драматіка Карола Горака Адолф Івановіч Добряньскый – Зоря на небі, над головов штранґ.  Русиньска оброда на Словеньску, знова пририхтовала в тім році події, котры были присвячены Добряньскому. Мож спомянути, же ціле тогорічне святкованя Дня Русинів, котре проходило в місяці юн, было як раз в дусі юбілею. Округлый стіл Русинів Словеньска передав в юбілейнім році памятну плакету Петрови Трохановскому, вызначному русиньскому діятельови із Лемковины. Тота плакета была передана як унікатный оріґінал, на котрім є выображене лоґо Року Адолфа Добряньского. В перебігу днешнього дня ся Русины стрітли і в просторах Руського дому, котрый находить ся в центрі міста Пряшів. Праві там святочно одкрыли памятну таблу Добряньскому. Тым ся із боку Округлого стола Русинів Словеньска офіціално закінчив юбілейный рік. Днесь дала свій вклад ку закінчіню Рока Адолфа Добряньского і Матиця словацька. В просторах Театру Александра Духновіча ся з початком о 10.00 год. одбыла святочна академія, в рамках котрой были прочітаны нелем лекції о Добряньскім, але одбыв ся і фолклорный проґрам.
(Петро Кімак-Фейко)