Днешня деревяна церьков в Габурі є репліков колишньой деревяной церквы, котра даколи стояла в селі. І хоч є наймолодшов, бо была поставена в 2011 року, уж днесь проходить комплехнов реконштрукцёв. Яка была причина даного крочая о тім уж говорить Душан Завадзкый, член справной рады Надації Деревяна церков Габура: „Од отворіня церквы, то значіть од єй уведжіня до жывота, перейшли істы рокы. В тім часі ся церков робила як могла. Была на то прызначена певна сума грошей, были і спонзоры,было то барз тяжке. Тым, же ся в тых часах поужыли слабшы матерялы, тым дакотры часті церьквы позначів і тот короткый час. З причины, абы нам церьков ся іші вецей непошкодила, сьме мусіли зачати з єй реконштрукційов“. Як далей Душан Завадзкый повів, теперь пробігать цілкова реконштрукція церкві. Зачінаючі вонкайшым натером, бетонованям внутрішніх просторів і кінчачі положіням новой підлагы а докінченям іконостасу.