Місто Гуменне дасть в тім році зо свого розрахунку шпортовым клубам дотацію 130 тісяч евр. Дванадцять шпортовых клубів дістане од 1 300 до 54 000 евр. Розділіня схвалили містьскы депутаты. Шпортовы клубы на теріторії міста жадали в тім році довєдна майже 185 тісяч. Комісія шпорту і молодежі при містьскім заступительстві розділила о 55 тісяч менше. Подля слов председничкы комісії Штефанії Данчіковой смотрила комісія на кількость дітей і молодежі в клубах ці втраты на транспорт. „Вірю, же у вшыткых клубах буде спокійность, бо в дакотрых клубах было і веце як стопроцентне піднятя дотації,“ повіла Данчікова про словацькый денник Korzár.
(Петро Медвідь)