Гуманітарна поміч, котру вызберали віруючі з Пряшівськой архієпархії была в минулый тыждень в часі, кедь віруючі на Україні славили свято Христового народжіня подля юліяньского календаря передана людям в україньскім місті Харьков і його околиці. Гуманітарну збірку выголосив іщі на зачатку децембра 2022-го року владыка Петер Руснак, апоштолскый адміністратор пряшівськой архієпархії. Як пресаґентуру TASR інформував говорця Міхал Павлішіновіч, штирї повны наложены додавкы одвезли прямо до донедавна окупованых області Україны священник Юрій Поповіч вєдно з діаконом Петром Токачом і дальшым допроводом. (TASR, Pkf)