Святочне отворїня новой бібліотекы ся днесь одбывать в Стропкові. ,,Просто на містьскім урядї в ёго недоконченій части ся рокы находив невывжытый дость великый простор а по ёго управах сьме вытворили красне середовище про нову бібліотеку.“ увів пріматор Стропкова Ондрей Брендза. Просторы бібліотекы были діспозічно змінены, іншталовали там новы розводы електрины і курїня, забезпечене было модерне мултімедіалне выбавлїня, выбудовали новы соціалны заряджіня про верейность. Великов выгодов є і лїпша доступность бібліотекы ,,просто з уліцї“ про мамічкы з дїточками і погыбово зневыгодненых чітателїв. До приправы проєкту бібіліотекы ся пустили іщі в роцї 2021, по спрацованю документації глядали жрідла на фінанцованя ставебных управ і выбавлїня новой бібліотекы. ,,В роцї 2023 сьме были успішны у вызві міністерства інвестіцій выголошеной окресным урядом становленой про найменше розвиты окресы а на ставебны роботы сьме здобыли 100.000 евр. Цїла преставба стояла скоро 160.000 евр а часть з нєй сьме так фінанцовали з властных жрідел,” повів пріматор. Бібліотека мать в сучасности скоро 17.000 публікацій. ,,Наша бібліотека ся стане атрактівным а доволю сі повісти мултіфункчным простором на релакс і навчаня“ додав.

(TASR, Шутіова)