Русины бы ся мали пышыти іконами, котры ся находять в православных і ґрекокатолицькых храмах на северовыході Словакії. Думать собі о тім директор Справы Народного парку Полонины Мірослав Бураль, котрый у своїм вольнім часі пише іконы. Іконы, значіть сакралны образы, котры “бісідують“ Письмо Святе і находять ся в реґіоні з русиньскым обывательством, подля  Бураля своїм штілом ся розходять з прінціпами дакотрых існуючіх канонів творіня.  Розмах хрістіанства выходного обряду на теріторії Карпатьского облука в 16-ім і 17-ім столітю быв прічінов, же офіціалны ділні іконопису в Росії ці Ґреції не старчіли продуковати достаток ікон, і так їх зачали творити путуючі монахы. Красу карпатьскых ікон бы хотів Бураль в будучности пропаґовати інтензівніше. В Стащіні планує выбудовати ділню іконопису, де бы собі писаня ікон могла выпробовати і шырока публіка.  Єй частьов бы мала быти і ґалерія 30 ікон на Словакії, котры він поважує за найкрасшы.  (TASR, Pkf)