Вчера ся на Словакії закінчів 15-ый світовый конґрес Русинів, котрый ся сходить од року 1991. В Любовняньскых купелях і в Камюнці при Старій Любовні ся зыйшло понад 200 гостів і делеґатів з десятьох країн Европы і Северной Америкы. Як председа Русиньской оброды на Словеньску Мартін Караш у своїм вступнім слові на отворіню світового конґресу повів, „вірю, же і до будучности будуть на конґрес приходжати люди, котры актівно діють в області русиньского языка, історії, культуры, реґіоналного розвитку, в області політикы, економікы, масмедій і дальшых, же ту на конґресі будуть находжати партнерів з іншых держав, зкотрыма будуть надвязувати контакты і будучу співпрацю, выміну скусеностей, выміну людей і колективів і споплочныма силами будуть робити на розвитку русиньского народа.“ 

В рамках першой святочной части конґресу председа Світового конґресу Русинів Штефан Лявинець передав Премію Василя Турока – Гетеша і почестны грамоты. Премію Василя Турока-Гетеша за розвиваня русиньской културы здобыла довгорічна редакторка русиньской періодічной і неперіодічной пресы Анна Кузмякова. Другым оціненым є Іван Попо, русиньскый історік, за котрого премію перевзяв сыновець Димитрій Поп молодшый. Почестны грамоты передав председа конґресу індівідуалным особам і інштитуціям. Оціненыма стали: Іґор Латта (Словакія), Марія Саґін (Румунія), Светлана Мурешан-Петрецкі (Румунія), Валерій Падяк (Україна), Андрій Манайло (Мадярьско) і Франтішек Крайняк (Словакія). В рамках інштітуцій дістали грамоты Културне товариство Русинів Румунії, Інштитут русиньского языка і културы Пряшівской універзіты в Пряшові і Карпаторісиньскый дослідницькый центер в США. В рамках  світового конґресу одбыла ся і вольба членів і наслідні веджіня Світовой рады Світового конґресу Русинів. Др. Штефан Лявинець став знова председом Світового конґресу Русинів на функчный період 2019-2021. (Пкф)