Архієпіскоп-номінант Йона (Йосиф) Максим, котрый быв призначеный за нового пряшівского архієпіскопа і митрополіту, в пятніцю 3-го новембра 2023-го року пришов до Пряшова. В дополідняйшых годинах стрітив ся з робітниками Архієпархіалного уряду в Пряшові і Ґрекокатолицькой теолоґічной факулты Пряшівской універзіты. Владыка-номінант так само навщівив і богословску семінарію, де стрітив ся з веджіньом і богословами. На пів другу пополідне одбыла ся пресконференція, котра проходила в просторах Архієпархіалного уряду в Пряшові і на котрій бісідувало ся окрім іншого і о терміні єпіскопского рукоположіня. Кедьже владыка-номінант є іщі все іґуменом в Унівскій лаврі, не може лишыти монастырь без свого наслідника. Як повів, мусить ся як отець постарати о то, жебы одбыли ся вольбы нового іґумена, што бы хотів стигнути іщі перед новым роком. Єпіскопске рукоположіня новой головы Ґрекокатолицькой церькви на Словакії одбуде ся 27-го януара 2024-го року в Катедралнім соборі святого Йоана Крестителя в Пряшові. (ЛЕМ.ФМ, Пкф)