Русины на Словакії собі у тім році припоминають 30 років од святочного выголошіня кодіфікації русиньского языка. Тота про Русинів важна історічна дія одбыла ся 27-го януара 1995-го року в Братіславі. З той нагоды Округлый стіл Русинів Словакії (ОСРС) выголосив на своїм посліднім засіданю в октобрі 2024-го року рік 2025 за Рік русиньского языка. З той нагоды днесь, в пятніцю 24-го януара, собі Русины в просторах Театру Александра Духновіча в Пряшові припомянуть тоту річніцю святочнов академійов, котру приготовила Русиньска оброда на Словеньску. Тота орґанізація, найстарша русиньска пореволучна, была ініціатором і має неоцінительну заслугу при кодіфікації русиньского языка на Словакії. На академії одпрезентують ся і умелці професіоналных русиньскых тілес – Театру Александра Духновіча і Піддукляньского умелецького людового субору. Представителі ОСРС і партнеры платформы собі річніцю знова припомянуть 27-го януара в пополідняйшых годинах подійов при памятній таблі, котра кодіфікацію припоминать, на інтернатах Дружба в Братіславі. Якраз в конґресовій салі в рамках просторів Дружбы перед 30-ма роками одбыло ся выголошіня кодіфікації. Темов русиньского языка і річніцьов кодіфікації занимати ся будуть многы нашы русиньскы орґанізації ці інштітуції, меджі нима і наше інтернетове радіо русин ФМ, котре приготовлює к даній події на понедільок релацію. (ЛЕМ.ФМ, Пкф)