В окресі Стропків планують ліпше схосновати мінералны жрідла і взаємно їх перепоїти про розвиток турістічного руху. Містным самосправам помічну руку при реалізації проєкту під назвов Купельна путь подав Пряшівскый самосправный край.Якраз председа жупы Мілан Маєрьскый в пятніцю 28-го авґуста підписав із участниками ініціатівы меморандум о співпраці. Проєкт рахує з вытворіньом 12-ох меншых лічебно-регабілітачных центрів, ревіталізаційов околіці існуючіх мінералных жрідел і перепоїньом далшых актракцій реґіону. По реалізації напланованых актівностей проєкт має выґенеровати понад 1100 робочіх місць. Розрахунок проєкту одгадує ся на 250 міліонів евр, котры хоче окрес Стропків здобыти з підпоров державы, припадно з операчного проґраму Словакія. На проєкті партіціпує веце містных самосправ. Конкретно іде о Брусніцю, Ґрибів, Хотчу, Колбівці, Малу Поляну, Сташківці, Токаїк, Тураны на Однавов, Варіхівці, Войтівці, Вышній Грабовець і місто Стропків.

(Медвідь)