Пантеон особностей Першой світовой войны святочно одкрыли в пятніцю 27-го септембра 2024-го року в Нижній Полянці, Бардейовского окресу і то за участі шефа Міністерства інвестіцій, реґіоналного розвитку і інформатізації Словацькой републікы Ріхарда Рашіго. Інформовала о тім аґентура TASR. Як про аґентуру повів староста села Ян Цундра, в рамках пантеону є наіншталованых 12 таблічок присвяченых найвызначнішым особам, котры брали участь на боях коло Нижньой Полянкы і в шыршій околіці. Поступно бы мали прибывати далшы таблы з іменами. Іде о бетонову ставбу высоку 2,7 метра, котра є довга довєдна 35 метрів. Як дале повів староста, же „має дві стрілні, што має припоминати войновый окоп з даного періоду. Кедь ся поставиме до пантеону, єдиный выгляд є на верьх Каштелик, де реално проходили бої,“. На таблах суть мена ґенералів, але і писателів, новинарів ці архітектів. Єдна є присвячена незнамому воякови. Збудованя пантеону было єднов із актівностей в рамках черезгранічного проєкту фінанцованого із штруктуралных фондів. Выникнув у співпраці з Клубом воєньской історії Бескіды. Фото: ЛЕМ.ФМ (ЛЕМ.ФМ, Пкф)