6-го авґуста припомянули сьме сові 89 років од народжіня Енді Варгола. Із той нагоды собі Музей модерного уменя Енді Варгола в Меджілабірцях хотів припомянути того вызначного умелця русиньского походжіня в родиннім дусі. Зато на днесь у своїх просторах приготовив святочну інавґурацію Родострому Енді Варгола, на котрого реалізацію дав грошы зряджователь музею – Пряшівскый самосправный край. Авторами родострому суть двоми професіоналны вытварници Мартіна Блащакова і Мартін Кудла, котры ся окрім свойой властной умелецькой творчости занимають і мальованыма родостромами. Кідьже было тяжше іти даяк веце до історії предків Енді Варгола, бо стары матрикы ся не всокотили, на візуалній мапі мож найти наприклад образок із родиска Варголовых родічів – села Микова, родный дім Вархоловых в Пітсбурґу, але і славный ательєр Factory, котрый мав Варгол в Ню Йорку. Родостром є зробленый на патінованім папірю, котрый має розмір 115 на 180 цм. Дакотры елементы окрашіня суть позолочены 24-каратным золотом. Одднесь є родостром частьов сталой експозіції в Музею модерного уменя Енді Варгола.
(Петро Медвідь)