Од зачатку рока суть в Гуменнім містны гражданьскы патролі, котры діють головно в середовиску марґіналізованых ромскых комуніт на теріторії міста. На проєкт здобыла самосправа фінанчну дотацію із Европского соціалного фонду в рамках операчного проґраму людьскы жрідла, причім втраты на його реалізацію суть на уровни веце як 200 тісяч евр. Інформовало о тім веджіня міста на своїм інтернетовім сайті. Шпеціфічным цільом проєкту, котрый буде тырвати аж до кінця рока 2020, є підняти фінанчну ґрамотность, вытваряти і утримовати робочі місця про марґіналізованы комуніты, головно Ромів. Гражданьскы патролі мають на роботі головно охорону верейного порядку, пріватного і верейного маєтку, охорону дітей і молодежі перед неґатівныма ділами, охорону жывотного оточіня і дозераня на ход і безпечность транспорту.
(Петро Медвідь)