В найблизшых двох роках мають быти поставлены новы технічно-гіґєнічны працовиска на скоре одстранёваня неприпустного технічного ставу технолоґії влаковых суправ і на чіщіня ваґонів особной доправы. Мають быти поставлены в Гуменнім, во Зволенї і в Новых Замках. Проєкт їх выставбы быв з великой части підпореный з еврофондів. Як у Зволенї увів міністер доправы Арпад Ерсек, железніцї можуть здобыти до своїх влаків цестуючіх лем тогды, кідь будуть скоры, пресны і чісты. У звязї з тым увів ґенералный директор Железнічной сполочности Словеньско Філіп Глубоцькый: „ Выбудуєме ту модерне працовиско, котре буде вознї утримовати чісты, жебы ся продовжыла їх жывотность. Нове технічне працовиско зась значно скоротить цїле утримованя влаків.“ Інформацію принїс Korzár SME.
(Зденка Цітрякова)