Протягом лїта ся можуть дїти і дорослы одвезти в окресах Бардеёв і Свідник турістічныма влачіками. Єден з них ходить на окружній трасї Бардеёв – Бардеёвскы купелї а другый у Свіднику на трасї до Долины смерти. ,,Бардеёвскый Влачік Драчік завезе турістів ку найінтереснїшым і найнавщівлянїшым місцям Бардеёва і Бардеёвскых купелїв. На будькотрій заставцї можуть путуючі выступити, пообзерати сі красы історічного центра Бардеёва ці навщівити забавный парк а пізнїше наступити на влачік а продовжовати в яздї до Бардеёвскых купелїв,” увів Радомір Йанчошек, директор Теріторіалной орґанізації путёвого руху Шаріш- Бардеёв з тым, же язда тырвать приближно годину а денно бы мав влачік абсолвовати сім язд. Турістічный влачік у Свіднику ходить все од середы до недїлї до конця лїта. Протягом язды суть путуючім подаваны інформації о інтересах міста і реґіону. Путовне платить цїлый день а є можне наступовати і выступовати на заставках на трасї. Близшы інформації найдуть інтересуючі на вебовій сторінцї міста www.svidnik.sk , як і на профілох на соціалных сїтях.

(TASR, Шутіова)