Недавно вышла книжка під назвов Народны співанкы, музика і танці Русинів выходного Словеньска 2. Єй автором є Іван Чіжмарь зо Свідника, наш знамый етноґраф, фолклоріста, але таксамо і співак, котрого спів можеме чути і з нашого высыланя.  Обсяг книжкы творить богатство русиньского фолклорного матеріалу, історічных фактів, бібліоґрафічных дат і многых текстів русиньскых співанок із нотовым записом. Скоро 450-сторінокову книжку доповнюють фаребны фотоґрафії різных русиньскых фолклорных колектівів, окремых співаків, гудаків, прекрасных кроїв, але і людей, котры ся стали про автора і зберателя русиньскых традіцій його невычерьпным жрідлом. Неодділнов частьов книжкы, котру выдала Русиньска оброда на Словеньску, є і ЦД награвка із назвов Таку мі заграйте, яку вам заспівам.
(А. Кузмякова)